Loneliness ཁེར་རྐྱང་།

faiz ahmed faiz
ཧྥེ་ཙི་ཨཱ་མེད་ཧྥེ་ཙི
Loneliness like a good, old friend
visits my house to pour wine in the evening.
And we sit together, waiting for the moon,
and for your face to sparkle in every shadow.

ཁེར་རྐྱང་དེ་གྲོགས་པོ་རྙིང་བ་ཞིག་ལྟར

ངའི་ཁང་པར་དགོང་སྲོད་ལ་བསིལ་ཆང་བླུག་ཏུ་སླེབས་བྱུང
དེ་བས ངེད་གཉིས་མཉམ་གཅིག་ཏུ་བསྡད་དེ ཟླ་བ་དང

ཁྱེད་ཀྱི་ངོ་གདོང གྲིབ་མ་ཡོད་ཚད་ལ་འཚེར་བར་སྒུག་ཡོད

ཝཱ་ཎའི་ཞོགས་པ།

ཐོ་རེངས་དུས་ནས་ཆར་པའི་དངོས་གྲུབ་འབྱོར།།

ཤག་ཤག་སྒྲ་ཡིས་གཏི་མུག་གཉིད་ལས་བསླངས།།

སྒེའུ་ཁུང་བརྒྱུད་ནས་ཕྱི་རུ་བལྟས་པའི་ཚེ།།

ཆར་གྱིས་བརླན་པའི་ཡུལ་ལྗོངས་སྣུམ་ཞིང་མཛེས།།

བྱང་ཆུབ་ལྗོན་པའང་ཆར་གྱིས་གཙེས་པས་ན།།

ངལ་ཞིང་དུབ་པའི་ལོ་འདབ་ཐུར་དུ་དཔྱངས།།

གྲོགས་ཀྱིས་སྟོང་བའི་བྱེའུ་ཆུང་ཁེར་རྐྱང་དེ།།

ཡལ་འདབ་འཛིང་བའི་གསེབ་ན་འདར་ཞིང་འདུར།།

ལྕེབས་འཆི་ལྷ་མོ།

ལྕེབས་འཆི་ལྷ་མོ།









ཁ་སང་དེ་རིང་གློག་མེད་པས།
ངས་མཆོད་མེ་སྤར་ནས་སྡོད་ཀྱིན་ཡོད།
རིགས་མི་འདྲ་བའི་འབུ་མང་པོ་ཞིག
ཕར་འཕུར་ཚུར་འཕུར་བྱེད་བཞིན།
མཆོད་མེའི་ཁ་རུ་གཡེང་བ་ནི།
བྱིས་པ་འཚུབ་པོ་འགས་ཁྲོན་པ་ཆུང་ངུ་ཞིག
ཕར་བགོམ་ཚུར་བགོམ་བྱེད་པ་དང་འདྲ།


དེ་རིང་གློ་བུར་དུ། ལྕེབས་འཆི་ལྷ་མོ་ཞིག
ངའི་ཤག་གི་རྩིག་ལྡེབས་ཀྱི་སྡོམ་དྲར་འཚུད་འདུག་པ་མཐོང་།
ངས་དེ་ཚུར་བླངས་ནས་རྣམ་རིག་བསྒྲིམས་ཏེ།
ལུས་ཀྱི་སྡོམ་དྲ་རེ་རེ་བཞིན་བཤུས་རྗེས།
དེས་ང་ལ་གུས་འདུད་ཙམ་ཡང་མི་བྱེད་པར།
ཤིན་ཏུ་ངོ་ཚ་བའི་ཚུལ་གྱིས་མཆོད་མེར་མཆོངས་སོང་།
དེ་ནི་རླུང་རྟ་ཆག་པའི་བྱིས་པ་ཞིག་ཁྲོན་པ་འོབས་པོ་ཞིག་ཏུ་ལྷུང་བ་དང་འདྲ།

                                                                 ༢༠༡༡ ༨ ༣




བར་ཁྱད།


དེང་སང་གྲྭ་བ་མང་པོ་ཞིག་མཁས་དབང་རེད་འདུག་ལ།
མཁས་དབང་མང་པོ་ཞིག་གྲྭ་བ་ལོག་གིན་འདུག
ཁོས་ཚོས་ཆོས་ཤེས་ལ་སྲིད་ཤེས།
ད་དུང་། ཚོང་ལས་དང་ཞིང་ལས་ཀྱང་ཤེས།
ཁོ་ཚོ་ཁྱིམ་པར་གྱུར་པས་ན།
ཁོ་ཚོ་ལ་ཁྱིམ་མི་ཡོད་ལ་བུ་ཕྲུག་ཀྱང་ཡོད་པར་མ་ཟད།
ཚ་བོ་ཚ་མོ་ཡང་སྐྱེས་ཟིན་འདུག
ཁོ་ཚོའི་བུ་ཕྲུག་དག་སློབ་གྲྭ་ལེགས་པོ་འགྲིམས་པའི་སྐལ་བ་ལྡན་ཕྱིར།
སྐད་རིགས་མང་པོ་ཤེས་ལ་དབྱིན་ཇིའི་བོད་སྐད་ཀྱང་བཤད་ཤེས།
ཁོ་ཚོའི་ཚ་བོ་ཚ་མོ་ཚོ་ཆུང་དུས་ནས་དབྱིན་ཇིའི་སློབ་གྲྭ་འགྲིམས་ཕྱིར།
དབྱིན་སྐད་བཤད་པར་དབྱིན་ཇི་དང་ཁྱད་མེད་ལ།
བོད་སྐད་བཤད་པར་ཡང་དབྱིན་ཇི་དང་ཁྱད་མེད།

ང་ཡང་ཚུལ་ཁྲིམས་རྒྱུད་ལ་ལྡན་མིན་ཇི་ལྟར་ཡང་།
གྲྭ་གཏོ་མགོ་ལེབ་ཅིག་ཡིན་པར་ཁས་འཆེ་བཞིན་ཡོད།
དེ་བས། ངའང་གྲྭ་བ་ལོག་སྲིད་མོད།
མཁས་དབང་ཆགས་མི་སྲིད།
ཆོས་མི་ཤེས་ལ་སྲིད་མི་ཤེས།
ཚོང་ལས་དང་ཞིང་ལས་ལ་རྒྱུས་མངའ་ཙམ་ཡང་མེད།
ང་ལའང་ཁྱིམ་མི་དང་བུ་ཕྲུག་ཡོད་པར་འགྱུར་སྲིད་ལ།
ཚ་བོ་ཚ་མོའང་ཡོད་པ་འགྱུར་སྲིད།
ཡིན་ཡང་དེ་དག་སློབ་གྲྭ་ལེགས་པོ་ཞིག་ཏུ་གཞག་ཐུབ་མི་སྲིད།
དེ་བས་ཁོ་ཚོས་ཤེས་བྱ་མང་པོ་ཞིག་གི་སྒོ་ཐེམ་འགྲིམས་མི་ཐུབ།
རེད་དེ། ངས་ཁོ་ཚོའི་ལྕེ་རྩེ་ནས་དབྱངས་གསལ་གཉིས་ཀྱི་སྦྱོར་བ་
བརླག་འཇུག་མི་འདོད་ཅིང་།
བྲག་སྲིན་མོའི་གཏུམ་སྤྱོད་དང་།
ཕ་སྤྲེའུའི་ཁྲག་རྒྱུན་ཀྱང་དྲོད་མ་ཡལ་བར་ཉར་ཐབས་བྱེད་ངེས།
དེ་དུས་ང་ལ་གྲྭ་ལོག་མགོ་མཁྲེགས་ཞེས་སུས་མི་སྨད།
                                       ༢༠༡༡ ༨ ༣

སམ་བྷོ་ཊའི་ཡང་སྟེང་གི་སྙན་ངག་འདུ་ཚོགས།

སམ་བྷོ་ཊའི་ཐོག་ཁང་ཆེན་མོར།
བོད་ཀྱི་སྙན་ངག་པ་གསར་རྙིང་མང་པོ་ཞིག

"སྙན་ངག སྙན་ངག སྙན་ངག" ཅེས་པའི་འདུ་ཚོགས་སུ་ཕེབས་འདུག
ཚོགས་འདུར་གཡོལ་བར་དགའ་བའི་ངའང་།
དེ་རིང་ཚོགས་ཐོག་ཏུ་ཞུགས་ཏེ་གཏམ་བཤད་ཀྱི་གོ་སྐབས་འཚོལ་རྒྱུ་ཡིན།