གངས་དཀར་རི་བོར་ཕུལ་བའི་སྙན་ཚིག
འཛམ་གླིང་ས་ཡི་ཡང་ཐོག་ན་གནས་བཅས་ཞིང་།
མཛེས་པའི་འཕྱོར་ལྭ་གོན་པའི་གངས་དཀར་མ།
ང་ཁྱེད་ལ་ཅི་འདྲའི་དགའ་ཨང་།
ང་ཁྱེད་ལ་དགའ་བའི་གྲངས་ཀ་དེ།
ཁྱེད་ལུས་ཀྱི་ཁ་བའི་རྡུལ་གྱིས་མཚོན་པར་མི་ནུས་ལ།
ང་ཁྱེད་ལ་དུངས་བའི་ཟབ་ཚད་དེ།
ཁྱེད་ཉིད་རྒྱ་མཚོར་བཞུས་ཀྱང་དཔོག་ཐབས་བྲལ་ལོ།།
ཀྱེ་གངས་དཀར་མ།
ཡིན་པ་ནི་དེ་ལྟར་ཡིན་མོད་ཀྱང་།
ད་ལྟ། ཁྱེད་དང་ང་ཡི་བར་ཐག་ཐུང་ཐུང་མིན།
ཐུང་ཐུང་མིན།
གངས་དཀར་མ།
ཁྱེད་འཆལ་མོ་བཞིན་རྒྱང་དུ་བྲོས་པ་མ་ཡིན་ལ།
ང་མདོ་མེད་བཞིན་གཞན་ཡུལ་འགྲིམས་པ་མ་ཡིན་ཡང་།
བརྩེ་དུང་གི་མནར་གཅོད་འདི་འདྲ་མྱོང་དོན་ཅི།
གངས་དཀར་མ། ང་ཡི་གངས་དཀར་མ།
སླད་མེད་ཀྱི་སེམས་པ་འདི་ལ་བསམས་ཏེ་རེ་ཞིག་
སྒུགས་དང་།
ང་ཚུར་ལ་ཐོན་ཡོང་།
༢༠༡༡ ༡ ༡༢
No comments:
Post a Comment