ཆམ་ནད་གླུ་རུ་གྱེར་བ།

 ཝཱ་ཎའི་གནམ་གཤིས་མཛེས་མའི་སེམས་ཁམས་འདྲ་བས།།

ཁ་སང་དྲོ་ལ་དེ་རིང་འཁྱག་པར་གྱུར་འདུག །

ང་ནི་གླེན་པ་གནམ་གཤིས་ཡིད་ཆེས་བྱས་ཏེ།།

དེ་རིང་ཆམ་ནད་ལྕི་མོས་ལུས་པོ་མནར་སོང་།།

ཁ་སྣའི་བུ་ག་ལུད་པའི་ཕུང་པོས་ཁེངས་ཤིང་།།

ལུས་པོ་འགུལ་སྐྱོད་དཀའ་བ་རྒ་བས་མནར་འདྲ།།

ཁ་སང་མཛངས་མས་སྤྲད་པའི་ན་ཟུག་ལས་ཀྱང་།།

དེ་རིང་ཆམ་ནད་ལྕི་མོའི་ཟུག་གཟེར་སྡུག་བྱུང་།།

སྔོན་མ་ཆུང་དུས་ཨ་མའི་པང་ནས་འཚོ་དུས།།

འཁྱག་ནའང་ལྟོགས་ནའང་ན་ནའང་དཀའ་ལས་ཁག་ནའང་།།

ཨ་མ་ཞེས་ནི་མགོན་དུ་འབོད་དུ་ཡོད་ཀྱང་།།

ས་མཐར་ཤི་ནའང་ཨེ་ཞེས་འབོད་མཁན་དཀོན་འདུག །

བསམ་ཞིང་བསམ་ན་ལུས་འདིར་སྙིང་པོ་མི་འདུག །

དལ་འབྱོར་དོན་ཡོད་བྱ་བའི་ལྷ་ཆོས་བྱེད་འདོད།།

ཡིན་ཡང་ཨ་ཧོ་ང་ནི་གླེན་པ་ངོ་མ།།

ད་དུང་འཕྱོར་མོ་དེ་ལ་བརྩེ་དུང་ཆགས་འདུག །

དགུན་གྱི་གྲང་རླུང་ངར་མས་ལུས་ཕུང་བཤགས་ཤིང་།།

སེམས་སོང་བུ་མོ་དེ་ཡིས་སེམས་པ་བཤགས་པས།།

ད་ནི་ལུས་སེམས་ཆག་ཧྲུག་ས་འདིར་ལུས་ཀྱང་།།

ཡུན་རིང་འཚོའམ་འཚོའང་དོན་ཞིག་ཡོད་དམ།།

འཕྱོར་མོས་སེམས་ལ་སྡུག་གི་ཁུར་བོ་བསྣན་པས།།

གཡུ་འབྲུག་སྔོན་མོའི་མཇུག་མར་འཇུ་དགོས་འཁེལ་སོང་།།

ཆམ་པས་ལུས་ལ་ན་ཟུག་དྲག་པོ་བསྐྱེད་པས།།

རྒྱ་སྨན་བོད་སྨན་རིས་སུ་བསྐོར་དགོས་འཁེལ་སོང་།།

སེམས་སོང་བུ་མོ་ཆམ་པའི་རིམས་ནད་མིན་ཡང་།།

སེམས་ཀྱི་བུ་ག་སྡུག་གི་ལུད་པས་ཁེངས་སོང་།།

ཆམ་རིམས་འདི་ནི་གཤིས་བཟང་མ་དེ་མིན་ཡང་།།

ལུས་ཀྱི་སེམས་པར་ཟུག་གཟེར་སྡུག་བསྔལ་བསྐྱིལ་བྱུང་།།

ས་མཐར་འཁྱམ་པའི་ལོ་ཟླ་འདི་དག་ནང་དུ།།

ཨ་མ་དྲན་པའི་དུས་ཤིག་ད་བར་མི་དྲན།།

འཕྱོར་མོའི་ཕྱོགས་སུ་འཕྲིན་པ་བསྐུར་བའི་གྲངས་ཀ །

ཚངས་པས་བརྩིས་ཀྱང་ལྷ་ཆེན་ངལ་བའི་རྒྱུ་རེད།།

སྐྱོ་འོ་སྐྱོ་འོ་བུ་རུལ་ང་ནི་སྐྱོ་འོ།།

སྡུག་གོ་སྡུག་གོ་གླེན་པ་ང་ནི་སྡུག་གོ །

འཇིག་རྟེན་དཀར་ངོགས་འདི་ནས་ང་ལས་སྡུག་པ།།

བརྒྱ་བྱིན་མིག་སྟོང་ལྡན་པས་རྙེད་པར་མི་འགྱུར།།

ཕལ་སྐད་གསོང་པོས་གླུ་ཞིག་གྱེར་བ་འདི་ལ།།

ཉམས་མགུར་མཚན་གྱིས་བརྒྱན་ན་མི་རུང་མོད་ཀྱང་།།

ཕལ་པའི་ཉམས་ལ་འདི་ལས་མི་འོང་འདུག་པས།།

གློག་ཀླད་ཤེལ་ངོར་ཤར་མར་འཐག་འདོད་བྱུང་སོང་།།

                                                     ༢༠༡༣  ༡༠  ༡༧ཆམ་ནད་ཀྱིས་མནར་བའི་ཉིན་ཞིག་ལ་སྐད་གསོང་མཐོན་པོས་གྱེར་བ་འདིས་ནད་པ་ཀུན་དྲག་གྱུར་ཅིག