Tuesday, November 26, 2013

ང་རང་ལྟ་བུའི་ཉིན་ཞིག

------ཁྱེད་རང་རྨི་ལམ་དུ་མཇལ་རྗེས།

རླུང་བུ་ཞིག ཁྱེད་དྲན་བཞིན་པའི་ངའི་སེམས་པ་ལྟར།
འཁྱག་ཤུར་ཤུར་ལྡང་བྱུང་།
གནམ་རྒན་མོས་ཀྱང་། བརྩེ་བའི་གཟེབ་ཏུ་ཚུད་པའི་ཁོ་བོ་ལྟར།
གདོང་གནག་ཐུབ་ཚོད་ཅིག་གནག་རྗེས།
མིག་ཆུ་ལྟ་བུའི་ཆར་ཐིགས་འགའ་གཏོར་མོད།
ལོ་ཉེས་བྱུང་ཟིན་པའི་ཞིང་པ་ཚོར།
ཆར་ཐིགས་འགའ་དེས་ཅི་ཞིག་བྱ་ཨང་།
(ཁྱེད་དང་ཞིང་པ་ཚོ་མི་མཚུངས་ནའང་།)
ངའི་མིག་ཆུ་ཁྱེད་ལ་ཕན་ཐོགས་མེད་པ་ཇི་བཞིན།

ཉི་མ་སེར་པོ་དེས། ཁྱེད་བསྐྱུར་མི་ཐུབ་པའི་ངའི་སེམས་པ་ལྟར།
གོམ་པ་དལ་བར་དལ་བུར་སྤོས་ནས།
གནམ་ས་འདྲེས་མཚམས་སུ་སླེབས་འདུག་མོད།
དེ་ནས་ཕར་བཞུད་མི་འདོད་པར།
ངའི་སེམས་ཀྱི་ཆག་གྲུམ་བཞིན།
ཆ་ཤས་ཡོངས་རྫོགས་ས་རུ་ཟགས་ཀྱིན་འདུག
མཐའ་མར་སེར་ཐིག་ཅིག་ལས་ཅི་ཡང་མཐོང་དུ་དབེན།

ང་རང་ལྟ་བུའི་ཉིན་མོ་འདིར།
ང་ཕྱི་བ་ཞིག་ལྟར་སྤྱིལ་བུ་ཆུང་ཆུང་འདི་རུ་འཛུལ་ནས།
ཁྱེད་ཀྱི་སྐྲ་ལོ་ལྟ་བུའི་མུན་པ་དེས་སེམས་ཀྱི་རི་མོ་ཡོད་ཚད་གསུབ་པར་སྒུག་ཡོད།


༢༠༡༢    ༡༥

No comments:

Post a Comment