ཡིག་ཚད་ཀྱི་སྔ་ཕྱིར་བྲིས་པའི་སྙན་ངག

དུག་སྦྲང་དང་ཚ་བའི་རྒྱལ་ཁམས་ཕར་བརྒལ་རྗེས།
ཚིག་གསར་དང་དྲི་བ་མང་བའི་ཡུལ་ཁམས་ཤིག་ཚུར་མངོན་ཡོང་།
--------ཐོག་མའི་རོལ་དབྱངས།
༡
ན་ནིང་ཡིག་རྒྱུགས་མ་འཕྲད་པས།
དམིགས་འདུན་ཞེས་པའི་སྒྲུང་གཏམ་ཞིག་ལེགས་གྲུབ་བྱུང་།
ད་ལོ་ཡིག་རྒྱུགས་མ་འཕྲད་ན

༢
ཟུར་སྦྱོང་བ་ཚོ།
ཚ་བ་ཆེ་འདུག་དང་དུག་སྦྲང་མང་འདུག་མ་ཟེར།
ཨ་ཏི་ཤ་ཚོགས་ཁང་འདི་ལས་ཚ་བ་ཆེ་ལ།
དུག་སྦྲང་དེ་དག་ལ་ལྕགས་ཀྱི་མཆུ་གཏོ་ཡོད།
༣
ཝཱཎ་འབར་བཞིན་འདུག
མེ་ལྕེ་དང་ཀུ་ཅོ་མེད་པར་འབར་བཞིན་འདུག
ཁ་སང་གྲོང་ཁྱེར་དུ་མི་གཉིས་ཤི་འདུག་ཟེར།
གསལ་བོར་བཤད་ན་ཁོ་གཉིས་འབར་བཞིན་པའི་
ཝཱཎས་ཚོས་པ་རེད།
༤
གཅེར་བུར་འགྲོ་བ་དག
ཟླ་ལྔ་བའི་ཝཱཎས་འཚིག་འགྲོ།
པགས་ཚག་གོན་པ་དག
ཟླ་ལྔ་བའི་ཝཱཎས་རུལ་འགྲོ།
༥
ལག་པད་སྙིང་ཁར་སྦྱར་ནས།
ཡང་དག་ལྷ་ལ་ཕྱག་བྱེད་དུས།
ཨ་ཏི་ཤ་ཚོགས་ཁང་གི་ཏིང་སྒྲ་ཡིད་ལ་དྲན་པ་ཙམ་གྱིས།
ང་ཞི་བའི་ཁམས་འདི་ནས་ཡོངས་སུ་དཀྲོགས་སོང་།
༦
ཟུར་ཁྲིད་དུ་སོང་བས།
རྒན་ལགས་རང་ཉིད་ཀྱི་རང་རྣམ་བཤད་དེ་ཉིན་གསུམ་འགོར།
རང་སྦྱོང་ཧུར་ཐག་བྱེད་དགོས་པར་བསྐུལ་ཏེ་ཉིན་གསུམ་འགོར།
མཆོད་བརྗོད་དང་རྩོམ་པར་དམ་བཅའ་ཁྲིད་དེ་ཉིན་གསུམ་འགོར།
དུས་གསུམ་རྗེན་པར་མི་གཟིགས་ཀྱང་།
ཡིག་ཚད་ཀྱི་ཟིལ་ཤུགས་ཤེས་པའི་རྒན་ལགས།
ཡིག་ཚད་གཏང་བར་ཉིན་གསུམ་ལས་མི་འདུག
༧
ཟུར་སྦྱོང་བ་མང་པོས།
དྷརྨ་པ་ལའི་མཆོད་རྟེན་ལ་གཡས་བསྐོར་རྒྱག་དུས།
རྒྱ་གར་སྒྲོལ་མའི་རྒྱབ་གཟུགས་ལ་བལྟས་བལྟས་པས།
ཡིག་ཚད་ཅེས་པའི་འཇིགས་དངངས་ཅན་རྦད་དེ་གཏིང་བརྗེད་དུ་སོང་།
༨
རང་ཉིད་ཀྱི་ལྷ་རང་ཉིད་ཡིན་པར་འདོད་པའི་ཁོ་བོས་ཀྱང་།
གལ་ལ་ཐུག་དུས་ལྟག་སྒོ་བརྒྱུད་རྒྱུའི་བསམ་བློ་འཁོར་བྱུང་སྟེ།
དཀོར་གཉེར་བླ་རྒན་དེར་སྒོར་བཅུའི་འབུལ་བ་ཕུལ་ཏེ།
འཇིག་རྟེན་དྲེག་པའི་ལྷ་ལ་སྐྱབས་ཤིག་བཅོལ་དགོས་དྲན།
༩
ངས་འདང་དགོངས་རྨི་ལམ་ཡག་པོ་རྨིས་བྱུང་།
ཡིག་ཚད་ཀྱི་རྙི་ལས་ཐར་བ་རྨིས་བྱུང་།
པད་འབྱུང་ཁང་ཚན་དུ་ཉལ་བ་རྨིས་བྱུང་།
ཤསཏྲི་དང་ཨཅརྱ་བཅས་ཀྱང་ཐོན་པ་རྨིས་བྱུང་།
༡༠
ཡིག་ཚད་ཅེས་པའི་རྒྱ་མའི་སྟེང་དུ་རང་ཉིད་ལྗིད་ཚད་འཇལ་སྐབས།
ཧ་ཅང་ཡང་དྲགས་པས་རྒྱ་མ་ཨ་སློག་བརྒྱབས་བྱུང་།
༡༡
ཡིག་ཚད་ཅེས་པའི་འཇིགས་དངངས་ཅན་དེ།
གླ་རྙི་བཞིན་ཁོ་བོའི་སྐེ་རུ་འཁོན་དུས།
ང་གླ་བ་བཞིན་འཕག་འཚག་ཇི་ལྟར་བྱས་ཀྱང་།
ཐར་བའི་གནས་ཤིག་གང་དུ་ཡོད།
༡༢
ལོ་མ་བརྒྱ་ཕྲག་གི་དཀྱིལ་ནས།
ལོ་མ་ཞིག་ཅི་ཡིན་འདི་ཡིན་མེད་པར་སར་ཟགས།
དེ་ནི་ཡིག་ཚད་པ་ཞིག་རྒྱུགས་མ་འཕྲད་པ་དང་ཀུན་ནས་མཚུངས།
ལྷགས་རླུང་བསིལ་བུ་ཞིག་ལྡང་བས།
སླར་ཡང་ལོ་མ་འགའ་ལྷབ་ལྷུབ་སྐྱོད་བཞིན་སར་ཟགས།
དེ་ནི་ཡིག་ཚད་པ་འགའ་མེ་འཁོར་ས་ཚིགས་ནས་བྲེལ་བཞིན་པ་དང་ཡང་དག་མཚུངས།
༡༣
ཚ་བ་རེ་རེ་ཐ་སྙད་རེ་རེ་ཡིན་ན།
ངས་ཐ་སྙད་དེའི་ནང་ངོས་བརྟོལ་ཏེ་ནང་ངོས་ནས་མར་བལྟ་ཐུབ་ངེས།
དུག་སྦྲང་རེ་རེ་དྲི་བ་རེ་རེ་ཡིན་ན།
ངའི་ཤ་ཚིལ་ཁྲག་གསུམ་ཕུག་སྟེ་རུས་རྐང་ལའང་ཟུག་གཟེར་རྒྱག་བྱུང་།
༡༤
ཚ་བ་དང་དུག་སྦྲང་མང་བའི་ཡུལ་གྲུར།
མུ་ཏིག་བསྟར་ལ་རྒྱུས་འདྲའི་རྔུལ་ཆུ་རེ་རེ་ཕར་ཕྱིས་རྗེས།
ཚིག་གསར་དང་འདྲི་ཚིག་མང་བའི་ཤོག་ལྷེ་དག་ཚུར་བླངས།
ད་དུང་ལྟོ་བ་འགྲང་ཙམ་དང་སྐོམ་པ་སེལ་ཙམ་གྱི།
བཟའ་བ་དང་བཏུང་བ་ཡང་དགོས་པས།
ཞིབ་ཏུ་བསམས་ན་ཟུར་སྦྱོང་གི་དུས་སྐབས་འདི་མྱ་ངམ་ཐང་ཆེན་ཞིག